Popullsia e Bashkimit Evropian u tkurr për të dytin vit radhazi vitin e kaluar, njoftoi sot zyra e statistikave të BE-së, pasi rajoni është tronditur nga më shumë se dy milionë vdekje nga koronavirusi.
Sipas Eurostat, popullsia e 27 vendeve që përbëjnë BE-në ka rënë me pothuajse 172,000 që nga viti i kaluar dhe me më shumë se 656,000 që nga janari 2020.
“Në vitin 2020 dhe 2021, migracioni pozitiv neto nuk kompensoi më ndryshimin negativ natyror në BE dhe si pasojë, popullsia totale e BE-së po zvogëlohet”, tha zyra e statistikave, duke treguar ndikimin e pandemisë.
Numri i vdekjeve filloi të tejkalonte lindjet në BE një dekadë më parë, por emigracioni nga jashtë BE-së ndihmoi në ndryshimin në vitin e parë të pandemisë.
Hera e fundit që BE regjistroi një rënie të popullsisë ishte në vitin 2011 — e vetmja herë tjetër që nga viti 1960 — por ajo është rritur me shpejtësi për shkak të migrimit neto.
Duke pasur parasysh pandeminë, një popullsi në plakje dhe nivele relativisht të ulëta të lindjeve, Eurostat tha se vdekjet do të vazhdojnë të tejkalojnë lindjet në vitet e ardhshme.
“Nëse është kështu”, tha Eurostat, “rënia ose rritja e popullsisë totale të BE-së në të ardhmen ka të ngjarë të varet në një masë të madhe nga kontributi i dhënë nga migrimi neto”.
Ndërsa Italia, Polonia dhe Rumania regjistruan rënien më të madhe të popullsisë, më shumë se gjysma e vendeve anëtare të BE-së panë rritjen e popullsisë së tyre, me Francën, Holandën dhe Suedinë që kryesojnë renditjen.
Sipas Eurostat, 446.8 milionë njerëz jetonin brenda BE-së në janar 2022.
